- Tíðindi, mentan og ítróttur
Krista umboðar Føroyar í OL
![](https://kvf.fo/sites/default/files/styles/grein-ovasta-mynd/public/krista_morkore_2.jpg?itok=yMc5vM7O)
Um vikuskiftið svam Pál Joensen undir kravtíðina til Olympisku Leikirnar, sum verða í Rio de Janeiro í summar, og í gjár varð greitt, at eisini Krista Mørkøre úr Klaksvík skal svimja kapp í Brasil í summar.
Hon fekk í gjár at vita, at hon hevur klárað kravtíðina at sleppa við til paralympisku leikirnar.
Í tíðindaskrivi boðar ÍSB frá, at Krista Mørkøre skal svimja 50, 100 og 400 metrar frísvimjing á paralympisku leikunum í Rio í september.
Á sterkasta liðnum
Í 2007 fekk Krista Mørkøre ein svull í heilan. Svullurin elvdi til, at høgra síða á andliti hennara er lammað og at hon stundum hevur óstýriligur rørslur í høgra armi og beini. Men tað tók kortini ikki mótið frá Kristu Mørkøre at svimja kapp, og nú skal hon vegna Føroyar svimja í sterkasta bólkinum á paralympisku leikunum.
ÍSB er er limur í IPC, og tí fer Krista Mørkøre at umboða Føroyar, tá hon kavar í hylin í Rio í september.
Pál Joensen, hinvegin, fer formliga at umboða Danmark, tí Ítróttarsamband Føroya hevur ikki limaskap í olympisku nevndini.