FAG tekur undir við eigarapolitikki

Føroya arbeiðsgevarafelag tekur undir við, at landið fær sær ein eigarapolitikk, men felagið hevur nógvar viðmerkingar í sínum hoyringarsvari.

Arbeiðsgevarafelagið heldur millum annað, at greitt ábyrgdarbýti eigur at vera millum nevndina í partafeløgunum hjá landinum og landsstýrisfólkið, sum varðar av felagnum.

Ikki skrivast eftir útlendskum reglum

Eigarapolitikkurin eigur at hava tilmæli um fíggjarligar málsetningar, so sum krøv um avkast fyri hvørt felag sær, serliga feløgini, sum kappast við onnur feløg.

Landsstýrið eigur at hugsa um, at feløgini í Føroyum eru minni enn feløg í øðrum londum. Tí eiga reglurnar ikki uttan nakað at verða skrivaðar av eftir útlendskum reglum.

Arbeiðsgevarafelagið mælir eisini til at gera eina einfalda skipan, sum ikki krevur so nógva umsiting. Felagið sigur seg hava fingið at vita, at nøkur almenn partafeløg meta leysliga, at tey noyðast at seta eitt ella tvey fólk afturat, tá eigarapolitikkurin kemur.