Nú merkist kreppan í frálandsvinnuni

Kreppan í norsku frálandsvinnuni hevur við sær, at fyritøkur sum søkja eftir fólki, fáa ovurhonds nógvar umsóknir.

Herfyri søkti Remøy Management eftir 46 fólkum, og hóast freistin at søkja ikki er farin, so hevur fyritøkan fingið meira enn 2.300 umsóknir.

Mett verður, at fleiri enn 100 skip í frálandsvinnuni hava einki arbeiði, og tí eru nógv fólk søgd úr starvi.

Skipið, sum Remøy Management søkir eftir fólki til, er eitt kaðalskip, ið skal sigla út frá Karlskrona í Svøríki, og tí verður manningin sett eftir teimum krøvum, sum eru.

Vilja hava skandinavar

Tað er felagið, ABB, sum eigur kaðalskipið, og felagið vil hava, at skandinavar í mest møguligan mun manna skipið.

Nakrir mans hava fingið starv, og teir eru fyri tað mesta norðmenn, hóast tað ikki er nakað krav.

Fyri at kunna avgreiða allar umsóknirnar skjótt, hevur Remøy Management stovnað eina nýggja teldusíðu, sum skal viðgera umsóknirnar eftir teimum krøvum, sum verða sett.

Tá norska Havstovan søkti eftir 25 sjófólkum í vár, fekk stovnurin næstan 1.700 umsóknir.