Gera mun á fólki

Tey, sum arbeiða hjá kommununum, fáa ikki løn, tá tey eru veðurføst heima við hús ella á veg til arbeiðis. Starvsfólk hjá landinum missa ikki lønina.

Tey, sum arbeiða hjá landinum, fáa, tá alt alment ferðasamband er steðgað fyri veður, kortini løn fyri dagin.  Hetta stendur tó ikki í sáttmálanum, Starvsmannafelagið hevur við Lønardeildina. 

Reglugerð ikki í gildi hjá kommunum

Landsstýrið setti av sínum eintingum regluna í gildi 6. mars í 1992. Men hesa reglu hava kommunurnar ikki.

Har skulu tey, sum ikki sleppa til arbeiðis fyri veður, annaðhvørt skráseta dagin sum frítíð ella verður dagurin drigin frá í lønini.

Starvsmannafelagið hevur havt málið við til sáttmálasamráðingar. Felagið hevur eisini spurt Kommunala arbeiðsgevarafelagið, men einki er komið burturúr.