Átalar málsviðgerð hjá kommununi

Tað tók kommununi eitt ár og fýra mánaðir at svara einum borgara, ið vendi sær til kommununa í einum byggimáli í fjør.

Ein borgari heitti 29. mai 2015 á Tórshavnar kommunu um at rinda sær fyri tær eykaútreiðslur, hann hevði havt í sambandi við, at hann keypti grundøki frá kommununi. 

SÍ EISINI Løgtingsins umboðsmaður rykkir eftir svari

26. september sendi hann kommununi áminning, og 26. apríl 2016 sendi hann enn eina áminning, men einki hendi.

Einki hendi í málinum, fyrr enn umboðsmaðurin, 6. oktober 2016, bað Tórshavnar kommunu um frágreiðing um viðgerðina av málinum.

Kommunan: Talan var um eitt mistak

Kommunan segði umboðsmanninum, at av misgáum hevði eingin málsviðgerð verið av málinum. Borgarin fekk sostatt ikki svar frá Tórshavnar kommunu fyrr enn umboðsmaðurin kom inn í málið.

Sostatt gingu meira enn eitt ár og fýra mánaðir, frá tí at borgarin sendi áheitanina til kommununa áðrenn hann fekk svar.

Hetta er alt annað enn nøktandi, heldur umboðsmaðurin, og gevur Tórshavnar kommunu átalu fyri handfaringina av hesum málinum.