Hofer viðgongur at hava tapt forsetavalið

Høgrasinnaða forsetavalevnið í Eysturríki, Norbert Hofer, hevur viðgingið, at hann hevur tapt forsetavalið, hóast allar atkvøðurnar ikki eru taldar.

- Kæru vinir, eg sigi tykkum takk. Tit hava stuðlað mær væl, og eg eri sera harmur um , at tað ikki eydnaðist. Eg ynski Alexander Van der Bellen til lukku, og heiti á allar eysturríkarar um at standa saman. Vit eru øll eysturríkarar, sama hvat vit hava valt, skrivar Norbert Hofer á Facebook. 

Valhølini lótu aftur klokkan fýra seinnapartin okkara tíð, og enn eru eingi almenn úrslit kunngjørd. 

Men valstaðarkanningar vísa, at hitt valevnið, Alexander Van der Bellen úr Grøna flokkinum fær 53,6 prosent av atkvøðunum, og Norbert Hofer úr Frælsisflokkinum fær 46,4 prosent.

Vunnið tvær ferðir í ár

Týska tíðindastovan, DPA, skrivar, at úrslitið byggir á, at 58 prosent av atkvøðunum eru tald. 

Er úrslitið eftirfarandi, er tað onnur ferðin í ár, at Van der Bellen fær flestar atkvøður á forsetavali í Eysturríki. Tað gjørdi hann eisini á valinum í mai, men tað varð ógildað.

Frælsisflokkurin kærdi um, at alt varð ikki farið rætt fram, og fekk viðhald. 

Nýtt forsetaval varð tí útskrivað at verða í dag.