Finnast at landsstýriskvinnuni

Orsøkin til skuldsetingina er, hvussu hon hevur svarað tveimum spurningum frá løgtingsmonnum um inntøkurnar hjá landi og kommunum seinasta 25 árini.

Sambært svørunum eru inntøkurnar hjá kommununum upp á seg vaksnar nógv meira enn tær hjá landinum.

Við hesi lýsing av støðuni kunnu fólk lættliga fáa ta fatan, at kommunurnar eru raskari at fara niður í lummarnar hjá landsins borgarum, sigur Kommunufelagið.

Landsstýriskvinnan "gloymir" upplýsingar

Felagið sigur, at kommunurnar í hesum tíðarskeiði hava yvirtikið nøkur málsøki frá landinum. Tey kosta í dag kommununum yvir 800 milliónir krónur.

Kommunurnar tóku við dagstovnunum í 2001, stuðli til børn við serligum tørvi á dagstovnunum og barnaverndini í 2005 og eldraøkinum í fjør.

Kommunufelagið leggur landsstýriskvinnuna undir at gloyma at nevna hetta í svørunum til Løgtingið, í tíðindaskrivi, sum formaðurin, Heðin Mortensen, hevur undirskrivað.

Tá kommunurnar tóku við eldraøkinum fingu tær pengar fra landinum, 403 milliónir krónur í fjør, sum var fyrsta árið.