Fólkatalið í Føroyum heldur fram at vaksa

So stórur fólkavøkstur hevur ikki verið í einum ársskeiði síðstu 15 árini. 

Stóra broytingin í gongdini í fólkatalinum kemur í høvuðsheitum av flytingini, har serliga fráflytingin er minkað nógv, samstundis sum tað hevur verið lítil vøkstur í tilflytingini.

Sí samlað yvirlit yvir fólkavøksturin niðast í hesi grein

Nettotilflytingin er 454, - tað er munurin millum tilflyting og fráflyting, og burðaravlopið er 289, ið er munurin millum fødd og deyð.

Tað er serliga nettoflytingin, ið er avgerandi fyri gongdina í fólkatalinum. 

Gongdin, sum vit síggja í fyrra 12-mánaðarskeiðinum 2014 - 2015, verður enn greiðari í seinna 12-mánaðarskeiðinum 2015 - 2016: - At nú er nettotilflyting alt árið uttan í august, at nettofráflytingin í august nú er nógv minni enn árini frammanundan. 

50.000 í februar

Verður gongdin næstu mánaðirnar á leið, sum hon er nú, veksur fólkatalið enn skjótari upp móti teim 50.000, enn væntað hevur verið.

Vøksturin hevur verið so stórur seinastu mánaðirnar, at nú verður tað kanska longu í februar-mars, at vit fara upp um 50.000.

Vøkstur uttanfyri høvuðsøkið

Broytingin nú er, at vøkstur er í øllum høvuðsøkjum í Føroyum, eisini í Sandoyar og Suðuroyar sýslum.

Fólkatalið veksur í 21 kommunum, og stendur í stað ella minkar í 9 kommunum.

Nógv størsti vøksturin í tali er í Tórshavnar kommunu við 412 fólkum - hetta eru 55 prosent av fólkavøkstrinum fyri alt landið.
Síðan er ógviliga langt niður til hinar kommunurnar.

Samlað yvirlit yvir vøkstur í fólkatalinum hetta tíðarskeiðið:

• Tórshavnar Kommuna er vaksin við 412 fólkum
• Klaksvíkar kommuna er vaksin við 64 fólkum, 
• Eystur kommuna við 37, 
• Vága kommuna við 36, 
• Nes og Sjóvar kommunur við 28 fólkum hvør, 
• Vágs og Tvøroyrar kommunur við 22 hvør, 
• Eiðis kommuna við 18, 
• Fuglafjarðar, Sunda, Runavíkar og Hvannasunds kommunur við 15-16 fólkum hvør, 
• Sumbiar, Kvívíks og Sørvágs kommunur við ávikavist 13, 11 og 10 fólkum, 
• Skopunar, Skálavíkar og Fugloyar kommunur við 6-7 fólkum hvør, 
• Sands og Kunoyar kommunur við ávikavist 4 og 2 fólkum 
• Í Viðareiðis kommunu er fólkatalið óbroytt.
• Minking er í Hvalbiar, Vestmanna og Porkeris kommunum við ávikavist 13, 10 og 9 fólkum. 
• Í Hovs kommunu við 6, Húsa og Fámjins við 3 hvør, Kunoyar og Húsavíkar við 2 hvør og Skúvoyar við 1.

Kelda: hagstovan.fo