Mál um brúkaragjøld í tingið

Jenis av Rana í Miðflokkinum hevur spurt Eyðgunn Samuelsen, landsstýriskvinnu í almannamálum, um Javnaðarflokkurin eisini fer at áleggja teimum eldru brúkaragjøld.

Jenis av Rana vil hava at vita, um politikkurin hjá tveimum samgonguflokkuum í býráðnum í Havn eisini fer at síggjast aftur í landspolitikkinum.

Hinir báðir flokkarnir í samgonguni, Tjóðveldi og Framsókn, eru eisini í meirilutanum í býráðnum í Tórshavnar kommunu.

Óttast ójavna

Tann meirilutin boðaði frá í gjár, at fólkapensjónistar í Tórshavnar kommunu kunnu keypa sær ymsar tænastur.

Jenis av Rana spyr eisini, um hendan avgerðin hjá tveimum samgonguflokkum ikki fer at órógva samráðingarnar hjá Eyðgunn Samuelsen um nýggja pensjónsskipan.

Hann spyr eisini, um avgerðin um brúkaragjøld í Tórshavnar kommunu ikki fer at føra til ójavna í liviumstøðunum hjá teimum eldru, tí tey í einum øki noyðast at gjalda fyri tænastur sum í øðrum økjum eru ókeypis.