Forsætisráðharrin eisini nevndur í Panamaskjølum

Tað hevur vakt ans, eisini uttanlands, at nýggi forsætisráðharrin í Íslandi, Bjarni Benediktsson, er nevndur í Panamaskjølunum eins og undanmaður hansara, Sigmundur Davíð Gunnlaugsson, sum noyddist at leggja frá sær tveir dagar eftir, at Panamaskjølini vórðu kunngjørd. 

Bjarni Benediktsson var fíggjarmálaráðharri í undanfarnu stjórn, men hann noktaði at fara úr starvinum, hóast onkrar veljarakanningar søgdu, at tað átti hann at gjørt.

Sigmundur Davið noyddist at leggja frá sær

The Washingt­on Post skrivar, at Sigmundur Davíð Gunnlaugsson noyddist at leggja frá sær, tí hann varð nevndur í Panamaskjølunum. Nú hevur Ísland fingið ein annan forsætisráðharra, sum eisini er nevndur í Panamaskjølunum.

Bjarni Benediktsson bíðaði eisini við at almannakunngera eina frágreiðing um Panamaskjølini til eftir altingsvalið 29.oktober, hóast hann fekk hana nakrar vikur fyri valið, og fjølmiðlar bóðu um frágreiðingina.