Bispur: hjúnalagslógin skal vera óbroytt

Føroya Stiftsstjórn, Felagið fyri kirkjuráðslimir og Prestafelag Føroya hava sent Rigmor Dam, landsstýriskvinnu í Mentamálum hoyringssvar viðvíkjandi uppskotinum um at taka kirkjuliga signing av borgarliga vígdum hjúnum úr hjúnalagslógini.

Í skrivinum stendur at "borgarliga gift - kona og maður, har annað ella bæði eru limir í fólkakirkjuni - hava lógartryggjað krav upp á kirkjuliga signing. Hetta skal vera óbroytt."

Hetta merkir, at bæði bispur, kirkjuráðslimir og prestar vilja varðveita hjúnabandslógina, sum hon er, og at grein 14 stykki 2, sum lógartryggjar rættin til kirkjuliga signing, ikki skal takast úr lógini.

Teir siga sostatt ikki beinleiðis nakað um, hvussu prestar skulu bera seg at, um borgarliga vígdir hjúnafelagar av sama kyni koma í kirkjuna at fáa signing.

Uppskotið um at taka grein 14 stykki 2 úr hjúnabandslógini varð sent til almennar hoyringar í síðstu viku, og skal fyri løgtingið í næstum. Verður tað samtykt, skal ríkislógartilmælið, sum gevur samkyndum loyvi at giftast, samtykjast í Fólkatinginum.