- Tíðindi, mentan og ítróttur
Norðurkorea royndarskotið rakett
![](https://kvf.fo/sites/default/files/styles/grein-ovasta-mynd/public/kim_jong-un.jpg?itok=9se1SMRB)
Norðurkorea hevur royndarskotið eina rakett, sum datt niður í japanska havið, umleið 250 fjórðingar úr landi.
Tað vátta bæði amerikanska og japanska verjumálaráðið, sambært Reuters.
Hetta er fyrsta norðurkoreanska royndarskjótingin, síðani Donald Trump gjørdist amerikanskur forseti.
Norðurkoreanski leiðarin, Kim Jong-un, segði í januar, at Norðurkorea fór at royndarskjóta eina rakett, sum kundi røkka langt.
Tá svaraði Donald Trump, at Norðurkorea var farið at menna eitt kjarnorkuvápn, sum kundi røkka partar av USA.
- Men tað verður av ongum, skrivaði Trump á Twitter.
Svara USA aftur
Myndugleikarnir í Suðurkorea siga, at endamálið við norðurkoreansku royndarskjótingini er at svara USA aftur.
Japanski forsætisráðharrin, Shinzo Abe, er í hesum døgum á almennari vitjan í USA, og á einum tíðindafundi í morgun segði Donald Trump, forseti, at USA styðjar Japan fult og heilt.
Shinzo Abe segði, at norðurkoreanska royndarskjótingin kann als ikki góðtakast.
Í fjør royndarskeyt Norðurkorea átta miðalrakettir, sum høvdu heitið Musudan. Hesar rakettir røkka millum ein og tríggjar kilometrar.
Áheitan á Kina
Umsitingin hjá Donald Trump, forseta, fer at royna at leggja trýst á Kina at halda í teymarnar á Norðurkorea, sum er sameindi hjá Kina, sigur ein kelda í amerikansku umsitingini við Reuters.
ST setti tiltøk í verk móti Norðurkorea í fjør, tí landið gjørdi kjarnorkuroyndarspreingingar og royndarskeyt rakettir, sum røkka langt.