Lógin um háskúlar broytast

Nú hevur Rigmor Dam, landsstýriskvinna, biðið løgtingið broyta lógina, so aldursmarkið verður níggjundi flokkur í fólkaskúlanum.

Tey, sum hava tikið prógv í níggjunda flokki ella hava sama aldur sum tey, tað er 15 ella 16 ár, skulu eisini sleppa í háskúla. 

Skulu fáa studning til mat

Harafturat verður skotið upp, at háskúlarnir eisini fáa studning til mat. Skotið verður harafturat upp, at ítróttur og rørsla og almenn siðmenning verða tikin við í endamálið hjá háskúlum. 

Mentamálaráðið tekur undir við Føroya fólkaháskúla, sum sigur, at neyðugt verður at hækka rakstrarstuðulin, tí skúlin noyðist at hava størri ansing í vikuskiftunum, nú næmingarnir verða yngri. 17 ára aldursmarkið er ein forðing hjá háskúlunum.

Til dømis søktu 19 um at sleppa í Háskúlan í Suðuroy á heysti í fjør. Bara tíggju vóru 17 ár ella eldri. Lógin um Húsarhaldsskúlan skal eisini broytast, so aldursmarkið har lækkar úr 16 niður í 15 ár.