Undirtøka fyri at leingja útbjóðingina

Øll Vinnunevndin tekur undir við uppskotinum hjá landsstýrismanninum í vinnumálum um fjórða útbjóðingarumfar at leita og framleiða kolvetni á føroyska landgrunninum, og at leingja leitiloyvi upp í fýra ár í senn.

Økið, sum Poul Michelsen skjýtur upp at bjóða út í fjórða útbjóðingarumfari, er umleið 32.000 ferkilometrar til víddar. Tað er eystan fyri Hetlandsrennuna og í ein útsynning úr Føroyum.

Broytast frá tveimum til fýra ár

Hóast 16 ár eru liðin, síðani fyrstu leitiloyvini vórðu latin, hevur tað ikki eydnast at finna kolvetni í rakstrarverdum nøgdum. Hinvegin er staðfest, at ein virkin kolvetnisskipan er á føroyskum øki. 

Eftir galdandi lóg ber bara til at leingja leitingarloyvi tvey ár í senn, men nú er ætlanin at broyta kolvetnislógina soleiðis, at møguleiki verður at leingja loyvi fýra ár í senn, og hesum tekur ein samd vinnunevnd eisini undir við.

Alt leitingarskeiðið kann tó í mesta lagi vera 16 ár. Atkvøtt verður um hesi bæði málini í tinginum mánadagin.