Kostnaðurin mettur til 13 milliónir

Skjøtil er nú settur á størsta frílendisøkið í Føroyum. Økið fevnir um Boðanes og Hoydalar og er til samans 282.000 fermetrar til støddar

Tað fer at kosta minst 13 milliónir krónur at gera frílendisøkið við Boðanes/Hoydalar. Skal grót leggjast á eitt grótbrot fer tað at kosta minst 10 milliónir krónur meira

Mynd: Skíggjamynd úr frágreiðingini "Frílendið Boðanes Hoydalar"

Sigmar Bláberg

Bjarni Mohr

15.05.2017 - 16:42

Gøtur skulu gerast í økinum, ein grasvøllur skal gerast á fløtuni í Hoydølum, sum er 8.000 fermetrar, plantast skal nógvastaðni og fleiri pláss skulu gerast í økinum til ymisk endamál.

Talan er um eina ætlan, sum bæði landið og Tórshavnar kommuna skulu hava ábyrgdina av, og ein arbeiðsbólkur legði í dag ætlanina fram. Prísurin fyri at gera økið til frílendisøki verður mettur til slakar 13 milliónir krónur.

Prísurin kann gerast væl hægri, alt eftir hvat myndugleikarnir velja at gera við gamla grótbrotið á Boðanesi. Skal tað fyllast upp, so verður mælt til at fáa grótið til vega úr Eysturoyartunlinum, sum nú er í gerð.

Men verður valt at leggja tak á grótbrotið og nýta tað til annað endamál, sum onkuntíð er mælt til, so verður talan um nógv størri upphædd, meir enn 10 milliónir krónur aftrat.