1234 gravir aftrat við Velbastaðvegin

Kirkjugarðurin við Velbastaðvegin verður nú útbygdur. Í fyrsta byggistigi eru 11.000 fermetrar, 1234 gravir.

Smápartafelagið Consax skal gera fyrsta byggistig fyri 14 mió. kr. Arbeiðið varð boðið út í innbodnari lisitasjón.

33.000 fermetrar eru tøkir til at víðka kirkjugarðin millum Glyvursveg, Vegin í Vika og Sandá.

Arbeiðið at útbyggja kirkjugarðin í Havn byrjar beint eftir ólavsøku. Eisini verður vegurin í Vika dagførdur.

Hevur skund

Færri enn 200 gravir eru eftir í kirkjugarðinum í Havn. Og okkurt um 140 jarðarferðir eru í Havn um árið, so útbyggingin hevur skund.

Arbeiðið við fyrsta byggistigi, nú kirkjugarðinum við Velbastaðvegin skal byggjast út, fer í gongd beint eftir ólavsøku.

Bygt verður út í fýra stigum.Útbyggingin er mett at kosta millum 23 og 25 mió. kr.

3,8 mió. kr. verða játtaðar í ár og fýra milliónir um árið, árini 2018 til 2023.

Consax ger eisini kirkjugarðin í Hoyvík fyri Tórshavnar kommunu.