Viðgera hoyringarsvar í næstu viku

Leiðslan á Landssjúkrahúsinum fer væntandi at viðgera hoyringarsvarið frá leiðandi ljósmóðurini á Landssjúkrahúsinum í komandi viku.

Leiðandi ljósðmóðurin fekk ætlanarskriv um uppsøgn tann 26. juli, og hon hevði freist at svara tann 9. august.

Í hoyringarsvarinum, sum var sent sjúkrahúsleiðsluni, biðja leiðandi ljósmóðurin og advokaturin um at fáa innlit í ítøkiligu grundgevingarnar fyri uppsøgnini.

Tað hava tey nú fingið, og freistin at svara innlitinum er í hesi vikuni.

Síðani fer leiðslan á Landssjúkrahúsinum at viðgera hoyringarsvarið og meta um, hvørt tað gevur høvi at broyta avgerðina um uppsøgn ella um leiðslan fer víðari við uppsagnarmálinum.

Talan er um eitt persónsmál, og tí vil hvørki advokaturin ella leiðslan á landssjúkrahúsinum viðmerkja orsøkirnar til ætlanarskrivið ella viðmerkingarnar frá leiðandi ljósmóðurini og advokatinum hjá henni.