Nýggj kirkja alt ov høg. Byggiloyvið aftur í nevnd

Nýggja kirkjan, sum skal byggjast á Glyvrum, er alt ov høg eftir byggisamtyktini fyri økið.

Byggisamtyktin loyvir kirkjubygging við Glyvraveg, men mesta loyvda hæddin er 8,5 metrar.

Nýggja kirkjan verður 21 metrar høg vestanfyri og 17 metrar eystanfyri.

Runavíkar býráð viðgjørdi fyri einari viku síðani umsókn um byggiloyvi til kirkjuna á Glyrum.

Vil ikki broyta byggisamtyktina

Tekniska deild hjá býráðnum mælti til at broyta byggisamtyktina, so kirkjan kann byggjast har, sum ætlanin er at byggja hana, ella gera serstaka byggisamtykt, sum loyvir hægri bygging enn 8,5 metrar.

Men tað heldur Byggi- og býarskipanarnevndin hjá býráðnum ikki vera skilagott. 

Hon heldur tað ikki vera ráðiligt at byggja so høgan bygning fram við høvuðsvegnum.

Nevndin heitti á Teknisku deild at koma við øðrum uppskotum um, hvar nýggj kirkja kann byggjast á Glyvrum.

Býráðið samtykti síðsta mánadag at beina málið aftur í Byggi- og býarskipanarnevndina og samráðast við kirkjuráðið um málið.

Kirkjan við Glyvraveg verður 1140 fermetrar stór.