MARK: Lesandi skulu flyta út ein mánað um árið

Lesandi, sum hava fingið leigusáttmála til nýggju íbúðirnar í Marknagili, sum smápartafelagið Mark byggir, hava skrivað undir uppá, at tey fara út úr íbúðunum í juli mánað.

Sambært Gordon Rajani, sum stendir aftanfyri Mark, er tað neyðugt, at tey flyta út ein mánað um árið, fyri at leigukostnaðurin kann vera so bíligur sum møguligt.

Tær 38 íbúðirnar, sum eru fyrsta byggistig, eru um at vera lidnar og verða klárar at flyta inn í eftir summarfrítíðina.

Annað byggistig fevnir um 55 íbúðir og ein bygning við felagshølum, sum kunnu leigast, og tað verður væntandi liðugt í mai, sigur Gordon Rajani.