Kommunurnar 100 milliónir meira í skatti

Kommunurnar fingu góðar 100 milliónir krónur meira í skatti í fjør, og skattainntøkan hjá landinum vaks slakar 50 milliónir kr. 

Tað vísir eitt yvirlit yvir fyribilsskattin í 2017 hjá Taks.

Skattainntøkurnar hjá kommununum vóru slakar 1,8 milliardir krónur í fjør. Í fyrraárið fingu kommunurnar umleið 1,7 milliardir í skatti. 

Vøksturin er góð seks prosent.

Landsskatturin í fjør var eina milliard og 440 milliónir krónur. Tað eru sløk fýra prosent meira enn árið fyri.

Eftirlønarskatturin var 27,5 milliónir størri enn í fyrraárið, ella 10 prosent, og kirkjuskatturin vaks 2,4 milliónir. 

Tað er hálvt fimta prosent meira enn í 2016, vísir yvirlitið yvir fyribilsskattin í fjør hjá Taks.