Fleiri línuskip eru á veg yvir á Flemish Kap

Ågot, Klakkur, Kambur, Stapin, Eivind, Pison, Sandshavið og Jákup B fingu í gjár loyvi at fiska burturav føroysku toskakvotuni á Flemish Kap.

Føroyska kvotan á Flemish Kap er í ár 2491 tons av toski. Fiskiskapurin á Flemish Kap verður skipaður við felagskvotu, og alt skal fiskast við línu. 

Tey átta línuskipini, sum higartil hava fingið loyvi at royna á Flemish Kap, fáa tí í meðal 311 tons at fiska. Men av tí at talan er um felagskvotu, so kunnu einstøk skip fiska meira enn hesi 311 tonsini, áðrenn samlaða felagskvotan er uppfiskað.

Sambært kunngerðini um fiskiskapin á Flemish Kap kann fiskiskapurin byrja 7. januar.

Hóast nýggja fiskivinnulóggávan leggur upp til at partur av føroysku kvotunum skulu seljast á uppboðssølu og latast út sum menningarkvotur, so verður øll føroyska kvotan á Flemish Kap latin línuskipum á sama hátt og síðstu árini.