Eiturmorð: Bretland vil hava ST uppí

Tað skrivar BBC, sum endurgevur bretska Uttanríkisráðið.

Theresa May, forsætisráðharri gav Russlandi freist til á midnátt í gjár at greiða frá, hvussu eitt russiskt framleitt nerva-eitur er komið til Bretlands, har Sergei Skripal og dóttir hansara Yulia vórðu eitrað. Men einki svar kom úr Moskva innan freistina.

Theresa May hevur boðað frá, at tiltøk skulu setast í verk móti Russlandi, og BBC roknar við, at tey verða kunngjørd í kvøld.

Russland hevur sagt, at tey høvdu "onga grund" at royna at drepa Skripal og dóttrina.

Eisini hevur Kreml áhaldandi noktað at havt nakað við málið at gera, og Russland hevur somuleiðis boðað frá, at eitthvørt stig hjá Theresu May fer at hava mót-tiltøk við sær úr Russlandi. 

Seinni í dag skal Theresa May geva bretsku tinglimunum eina dagføring av málinum.

Bretska Uttanríkisráðð hevur boðað frá, at morðroyndirnar í Salisbury 4. mars vóru gjørdar eftir einum "vælkendum mynstrið av russiskari stats-aggressión".