Skifta skorsteinin á Hagaleiti

Brennistøðin er í løtuni í gongd við at gera umfatandi umbyggingar. Gamli ketilin, sum er næstan 30 ára gamal, verður skiftur og nýggjur kemur ístaðin. Nýggi ketilin brennur ruskið skjótari, enn tann gamli.

Nýggi skorsteinurin, sum skal setast upp, verður bara 33 metrar høgur. Ikki er neyðugt við so høgum skorsteini longur, tí royk-reinsiskipanin, sum IRF hevur í dag, er so góð.

Seinni í ár verður farið undir at byggja nýggja móttøkuhøll, sum skal betra møguleikarnar at skilja burturkastið. Umbyggingarnar á Hagaleiti kosta 70 til 80 mió krónur. Arbeiðið verður liðugt næsta summar.