Lækni í umstríddum máli fríkendur

Hægsti rættur í Danmark hevur júst givið dóm í einum umstríddum máli í Danmark. Yngri læknin, sum varð dømdur fyri grova vanrøkt í samband við arbeiði sítt á Svendborg sjúkrahús í 2013, er júst fríkendur.  

Læknin varð í landsrættinum dømdur 5.000 krónur í bót fyri "grovere eller gentagen forsømmelse eller skødesløshed i udøvelsen af sin virksomhed", eftir at ein sjúklingur við diabetes lat lív á sjúkrahúsinum. 

Tá dómur varð givin í dag, varð læknin frífunnin, og sagt varð, at læknin ikki hevði vanrøkt ella verið gáloysur í sínum arbeiði. 

Umstrítt mál 

Læknin, sum nú er fríkendur, bað ein sjúkrarøktarfrøðing um at máta blóðsukrið á sjúklinginum. Boðini vórðu givin munnliga. Men mátingin varð ongantíð framd.

Sjúkrarøktarfrøðingurin, ið fekk boðini, hevur sagt, at hann minnist ikki, at hann skuldi havt fingið hesi boðini. 

Boðini vórðu heldur ikki noterað í journalin hjá sjúklinginum, og yngri læknin fylgdi ikki upp á boðini viðvíkjandi blóðsukur-mátingini hjá sjúklinginum, ið doyði á sjúkrahúsinum tríggjar vikur eftir innlegging.

"Tað kundi verið eg"

Eftir dómin í Landsrættinum vístu læknar kring alt Danmark stuðul til yngra læknan undir átakinum #Detkuhaveværetmig.

Við hesum vísa læknarnir á, at tyngda sjúkrahúsverkið er orsøkin til tragisku hendingina, og at læknin ikki einsamallur skal standa við ábyrgdini. 

Eisini læknar í Føroyum stuðlaðu læknanum undir hesum átakinum, sum myndin omanfyri vísir. 

LES EISINI: Føroyskir læknar stuðla dømdum donskum lækna

SÍ EISINI: #Detkuhaværetmig