Atlantic Petroleum stórt undirskot

Oljufelagið Atlantic Petroleum stríðist framvegis við at fóta sær sum felag. 

Sambært fráboðan til keypsskálarnar í morgun hevði Atlantic Petroleum stívliga 68 milliónir krónur í undirskoti í fjør.

Eginpeningurin í felagnum er nú negativur við 150 milliónum krónum.

Kursurin á partabrævinum hjá Atlantic Petroleum er nú 7,65 danskar krónur. Fyri einum ári síðani var partabrævið vert 11 krónur.

Graeme Fawcett, fyribilsstjóri í Atlantic Petroleum, sigur í fráboðanini til keypsskálarnar, at felagið hevur optimistiskar vónir um framtíðina, serliga eftir at felagið hevur fingið fíggjarligan stuðul frá felagnum London Oil and Gas.

Aðalfundur verður í Atlantic Petroleum á Hotel Hafnia í Havn, mánadagin 30. apríl.