Visitasjónsnevndin takast av

Sirið Stenberg, landsstýriskvinna í heilsumálum, hevur gjørt uppskot um at broyta sjúkrahúslógina, sum er sent til hoyringar.

Sirið Stenberg sigur í viðmerkingunum til uppskotið, at soleiðis sum skipanin hevur ment seg, verða flestu uppgávur, sum visitasjónsnevndin skuldi loysa fyri politiska myndugleikan, nú loystar minst líka væl ella betur av sjúkrahúsverkinum sjálvum.

Visitasjónsnevndin varð í síni tíð skipað við tí endamáli at fáa betri stýring á útreiðslunum til serviðgerð uttanlands.

Frammanundan kundu allir yvirlæknar í sjúkrahúsverkinum gera av at senda sjúklingar til viðgerðar í Danmark, og við loyvi frá landsstýrismanninum kundu yvirlæknar eisini senda sjúklingar til viðgerðar í øðrum londum enn Danmark.

Í 2011 varð Uttanlandstænastan skipað sum ein stápseind á Landssjúkrahúsinbum. Uppgávan hjá Uttanlandstænastuni fevnir um at samskipa sjúklingaferðir og sjúklingatilgongdir uttanlands.

Í 2013 varð fíggjarliga ábyrgdin av játtanini til serviðgerð uttanlands flutt til sjúkrahúsini. Endamálið við broytingini var at fáa ávísingarrættin og fíggjarligu ábyrgdina at verða tættari hvørjum øðrum.

Landsstýriskvinnan í heilsumálum sigur, at uppgávurnar, sum visitasjónsnevndin varð skipað til at loysa, nú verða loystar av sjúkrahúsverkinum sjálvum, og tí hevur visitasjónsnevndin sjálv mælt landsstýriskvinnuni til formliga at taka nevndina av.

Tað verður so gjørt við uppskotinum, sum nú er sent til hoyringar.

Hoyringarfreistin er 15. juni.