"Soleiðis kann ein ikki fara við menniskjum"

- Vit halda ikki, at tað er í lagi at flyta fólk, bara orsakað av pengum.

Tað sigur Rúna Sivertsen, forkvinna í TIGN, sum áhugafelag hjá teimum, ið vegna brek ella aldur hava tørv á røkt.

Sunda kommuna hevur júst avgjørt, at kommunan vil flyta 80 ára gamla Christian Joensen av Eysturoyar Ellis- og røktarheimi, tí Sunda kommuna, haðani hann er ættaður, vil ikki rinda fyri hann meira. Tí skal Christian Joensen flytast inn á røktarheimi á Mørkini í heimakommununi ístaðin.

- Eg haldi ikki, at ein eigur at gera hatta móti einum menniskja. Maðurin (Christian Joensen, red.) kann ikki svara fyri seg sjálvan. Men hansara avvarandi hava greitt givið til kennar, at tey ynskja ikki, at hann flytur, sigur Rúna Sivertsen.

Rúna Sivertsen sigur, at um talan var um ein avvarandi hjá TIGN, høvdu tey ivaleyst kært málið.