Rættarmálið heldur fram í dag

Hann er ákærdur fyri at hava eggjað einari javnaldrandi kvinnu til at fremja kynslig brotsverk móti sínum egna soni.

Kvinnan, sum er ættað úr Charlottenlund, varð dømd fyrst í mars mánaða. Hon játtaði seg seka í millum annað at hava roynt at neyðtikið, fyri at hava neyðtikið á annan hátt enn samlegu, fyri blygdanarskemd og fyri at gera upptøkur, liggja inni við og senda víðari barnapornografiskt tilfar - sum alt hevur við eitt og sama barn, sum, tá tað hendi í fjør, var 4 ára gamalt. 

Føroyingur skuldsettur

42 ára gamli føroyingurin er eisini skuldsettur í málinum. Hann skal hava skundað undir kvinnuna at gera hesa upptøkur.

Ákærin heldur í dag fram við at ganga í gjøgnum ákærupunktini í rættarmálinum móti føroyinginum, sum er ákærdur fyri at hava eggjað einari kvinnu at hava framt kynslig brotsverk móti sínum egna soni.

Avhoyringin av ákærda manninum heldur fram í dag, sigur Kaj Joensen, sum fylgir rættarmálinum í Lyngby fyri Kringvarpið.

- Tað eru heili 41 ákærir móti føroyinginum, og so skal kvinnan, sum er dømd í málinum, eisini avhoyrast, sigur Kaj Joensen.

Einastu vitni í málinum eru kvinnan, sum longu er dømd, og føroyringurin. Kvinnan skal eftir ætlan avhoyrast í dag, og so verður føroyingurin væntandi avhoyrdur. Tað er tó møguligt, at hetta í fyrsta lagi verður mánadagin. 

Dómur fellur væntandi í næstu viku, sigur Kaj Joensen, sum tó undirstrikar, at tað møguliga verður seinni. 

- Vit vita ikki annað enn, at tað allarhelst fellur dómur mánadagin, tað vita tó ikki við vissu enn, sigur Kaj Joensen.

Vit frætta meira frá um málið í tíðindasendingunum seinni í dag.