Givin at leita

bilur_2.jpg

Mynd: HáR

Leitingin bæði á sjógvi og landi er hildin uppat, eftir at ein persónbilur varð funnin á sjónum undir gamla leirvíksvegnum í gjár.

Einki fólk er saknað, so hildið verður fyri vist, at bilurin var tómur, tá hann fór á sjógv, 200 metrar norðan fyri nýggja húsið hjá SEV við leirvíksvegin.

Tað var stutt fyri middagssleitið í gjár, at løgreglan fekk boð frá fjallfólki í Leirvík um, at ein bilur var farin útav á gamla leirvíksvegnum og lá á sjónum.

Løgreglan fór á staðið saman við sløkkiliði og bátum, men staðfest varð skjótt, at einki fólk var í bilinum.

Bjargingarfólk hava leitað á landi eftir fólki, sum møguliga hava verið í bilinum, og kavarar hava leitað á sjónum.

Bilurin er tikin upp á land, og kavarar staðfestu, at einki fólk lá undir bilinum heldur. 

Lykilin stóð í bilinum, og bilurin, sum hevur automatiskt gear, stóð í neutral, í frígeari.

Løgreglan hevur funnið tann, sum eigur bilin, men bileigarin visti ikki, at bilurin var horvin ella, at nakar hevði tikið hann.

Í morgun ber ikki til at fáa nakað at vita um hendingina, annað enn, at leitingin eftir fólki helt uppat í gjárkvøldið.

Og eingin fráboðan er komin um, at fólk er saknað.