Vunnu hugskotskapping um Faktorhúsini á Tvøroyri

Ein arbeiðsbólkur hjá Tvøroyrar fornminnisfelag og Brim arkitektum vann kappingina um, hvussu Roykstovan ella Faktorhúsini á Tvøroyri skulu brúkast í framtíðini.

Kristin Michelsen, borgarstjóri á Tvøroyri, handaði virðislønina á 6.000 kr., á Mentanarnáttini fyri einari viku síðani.

Onnur virðisløn, 4.000 kr, varð latin Siri Andreasen, og triðja virðisløn, 2.000 kr, varð latin Róki Tummasarson.

Vinnararnir fingu heiðursbræv.

Tvøroyrar kommuna, sum fyrr í ár keypti Roykstovuna fyri 600.000 kr., vildi hava hugskot um, hvat húsini skulu brúkast til.

Tvey nøvn

Roykstovan er eisini nevnd Faktorhúsini. 

Freistin at lata inn hugskot endaði á middegi 23.mai.

Roykstovan er miðskeiðis á Tvøroyri, yvir av bygdarsavninum og havnarlagnum. 

Grundøkið er 1268 fermetrar, og á tí standa sethúsini og hjallur.

Faktorhúsini eru fyrstu sethús, sum vórðu bygd á Tvøroyri, tað var í 1836.