60 nýggj skeið á kvøldskúlanum

Jógvan Sørin Hansen, stjóri, sigur, at serliga eru nógv nýggj skeið um film.

Størri samstarv við Klippfisk hevur gjørt, at Kvøldskúlin nú kann bjóða skeið um at skriva til skíggja, um leikstjórn, at nýta ljós til film, at nýta videokamera, um klipping, um at gera heimildarfilm og so framvegis.

Eisini er "bootcamp" í skránni, har tey, sum hava verið á Nóllywood, hava fyrimun. Hetta er filmsskúli fyri ung.

Sjónleikaraskúlin hevur skeið til ymsar aldursbólkar, skeið um at skriva handrit til sjónleik og skeið um at sniðgeva pall og ljóð til sjónleik. 

Tilboðini til útlendingar eru eisini víðkað munandi. 

Kvøldskúlin er farin undir nýggjan leist, har útlendsku næmingarnir verða býttir í tveir bólkar, so frálæran kann leggjast til rættis eftir tørvinum hjá næmingunum.

Tað er, at tey, sum duga eitt sindur av føroyskum, eru ikki saman við teimum, sum als ikki duga føroyskt.

Tilmeldingin á heimasiðuni hjá Tórshavnar kvøldskúla byrjaði í gjárkvøldið og endar sunnukvøldið.