Triðingin meira toskur og hýsa í ár

Knappliga triðingurin meira av toski og hýsu eru avreidd í Føroyum til 1.oktober í ár enn fyrstu tríggjar ársfjórðingarnar í fjør.

Tað vísa tøl hjá Hagstovu.

Tølini eru smá, men vøksturin er sjónligur. Toskurin er vaksin 32,6 prosent og hýsan 31,3 prosent.

Men minni er fiskað av upsa, 15,6 prosent.

Samanumtikið eru avreidd eitt sindur færri tons av botnfiski í ár enn í fjør.

Men selt er fyri meira enn í fjør, munurin er 5,4 prosent, 38,7 milliónir krónur.