Barnabati biður um hægri játtan

Børn og ung hava eisini tørv á ráðgeving frá Barnabata um kvøldarnar og um vikuskiftið. Tí biður Barnabati løgtingið um at hækka játtanina næsta ár - úr 450.000 krónum upp í 1,2 mió kr.

Felagið hevur sent Fíggjarnevndini hjá løgtinginum bræv við umbøn um at hækka játtanina.

Í dag hevur ráðgevingin bara opið gerandisdagar frá kl 10-15, men tørvurin er nógv størri enn so, sigur Djóni Ejdesgaard, aðalskrivari í Barnabata.

Umframt at útbyggja ráðgevingina ætlar Barnabati eisini at arbeiða við átøkum at basa happing millum børn og ung á dagstovnum og skúlum.

Fíggjarlógin fyri 2019 er til viðgerðar í fíggjarnevndini hjá løgtinginum.