Aldrin so mong skotin í Svøríki sum í ár

Ongantíð fyrr eru so mong skotin í hel í Svøríki sum í ár.

Svenska kringvarpið skrivar, at 44 fólk eru skotin í hel í ár, hóast strangari vápnalógir og átøk móti bandakriminaliteti.

- Hetta minnir um okkurt slag av krígsstøðu, sigur Gunnar Appelgren, sum arbeiðir við bandavirksemi hjá løgregluni í Stokkhólmi. 

Hann sigur, at serligu átøkini hjá løgregluni í Stokkhólmi hava havt færri deyðiligar skottilburðir við sær har, men at samlaða talið í landinum er ræðandi stórt.

- Fyri at minka um tilburðirnar mugu vit samstarva við tollmyndugleikar og politivald í øðrum londum og á tann hátt minka um innflutningin av vápnum, sigur Gunnar Appelgren og nevnir onnur tiltøk, sum eisini mugu setast í verk í Svøríki, bæði hjá politinum og sosialu myndugleikunum, so færri børn og ung verða drigin upp í brotsmannavirksemi.

- Men eingin skjót loysn er, sigur Gunnar Appelgren frá løgregluni í Stokkhólmi við svenska kringvarpið.