Henrik Toft Hansen inn fyri stórabeiggjan

Danska verjukempan, René Toft Hansen, er liðugur við HM-endaspælið á hesum sinni. 

Hansen fekk ein skaða í seinasta dystinum hjá Danmark móti Noregi. Skaðin var so mikið álvarsligur, at René ikki spælir aftur í hesum endaspælinum. 

Venjarin hjá danska landsliðnum, Nikolaj Jacobsen, hevur í morgun boðað frá, at lítlibeiggin hjá René, Henrik Toft Hansen, er partur av danska hópinum. 

Tað hevur annars verið óvist, um Henrik fór at verða klárur til endaspælið, tí eisini hann hevur bart við skaða.

Sostatt hevur danski venjarin brúkt tvær av teimum trimum útskiftingum, sum kunnu gerast, eftir at endaspælið er byrjað. 

Fyrsta útskiftingin var sum kunnugt, tá føroyski Jóhan á Plógv Hansen gjørdist partur av hópinum, eftir at Hans Lindberg fekk ein minni skaða eftir fyrsta dystin hjá Danmark móti Kili. 

Vanliga verður síðsta útskiftingin goymd, skuldi ein málmaður fingið skaða, og tí er sannlíkt, at hópurin ikki verður broyttur aftur - í øllum førum ikki fyri enn millumrundan er avgreidd. Harumframt skal Jacobsen møguliga skifta ein spælara inn fyri Nicolaj Øris, sum eisini fór út við skaða í dystinum móti Noregi.  Enn er tó óvist, hvussu ógvisligan skaða talan er um, men Øris luttók ikki í venjingum í gjár, skrivar DR.dk. 

Alt bendir sostatt á, at føroyski Jóhan á Plógv Hansen varðveitir plássið á høgra vonginum tað, sum eftir er av millumspælinum. Hoyr samrøðu við føroyska Jóhan her. 

Danmark vann allar dystirnar í innleiðandi bólkaspælinum og fór soleiðis víðari til millumrundina sum nummar eitt. Í millumrundini skulu danir spæla ímóti Ungarn, Egyptalandi og Svøríki. 

Næsti dysturin hjá Danmark verður longu í kvøld, tá teir taka ímóti Ungarn. Tann dysturin byrjar klokkan 19.30 føroyska tíð, og danska kringvarpið vísir dystin á DR1.