Fólkatalið kvinkað eitt sindur uppeftir

Fólkatalið á Tvøroyri er kvinkað eitt sindur uppeftir seinasta árið, skrivar Tvøroyrar kommuna. Seinasta árið eru fleiri flutt til enn frá Tvøroyri. Fólkatalið á Tvøroyri er nú 1721, átta fleiri enn somu tíð í fjør.

Fólkavøkstur hevur eisini verið í fleiri øðrum kommunum í Suðuroynni hetta seinasta árið. Lutfalsliga størsti vøksturin er í Porkeri, har fólkatalið er hækkað við átta, so tað nú búgva 320 fólk har.

Ein lítil fólkavøkstur er eisini í Hovi og Sumba, í Fámjin stendur fólkatalið í stað, meðan færri fólk nú búgva í Hvalba og Vági enn tað gjørdu fyri einum ári síðani.