Kann als ikki góðtakast

Hetta eru viðurskifti, sum als ikki kunnu góðtakast.

Tað er avgerandi fyri fíggjarstýringina hjá landinum at síggja til, at hetta ikki hendir aftur. 

Tað er ábyrgdin hjá avvarðandi landsstýrisfólki og í síðsta enda hjá løgmanni at tryggja, at hetta verður fingið í rættlag beinanvegin. 

Fíggjarnevndin hjá løgtinginum er samd um roknskapin hjá landinum fyri 2017 og tekur undir við løgtingsgrannskoðarunum, sum løgdu roknskapin fyri tingið 2.november.

Grannskoðararnir vísa á, at nøkur av teimum afturvendandi átøkunum eru vorðin betri seinnu árini.

Týðandi brek

Tó eru týðandi brek, tá talan er um at halda játtanarreglurnar, og vantandi avgerðir hjá landsstýrismanninum í samferðslumálum í sambandi við, at Landsverk skuldarbindur landið.

Fyrivarni verður tikið fyri roknskapinum hjá sjúklingaviðgerðum uttanlands. 

Grannskoðararnir leggja dent á, at týðandi játtanarreglur verða ikki tiknar í álvara. 

Fróðskaparsetrið hevur bókað eina millión krónur í húsaleigu fyri 2017 í fíggjarárinum 2018. 

Umhvørvisstovan hevur bókað útreiðslur á tiltakið ferð á grøna orku, uttan at vøra ella tænasta er fingin afturfyri í fíggjarárinum. 

Grundleggjandi reglur 

Fíggingarleisturin í sambandi við orkutøk brýtur grundleggjandi reglur í játtanarlógini og roknskaparlógini. 

Landsverk skuldarbindur landið við langtíðarleigumáli, sum kemur í staðin fyri keyp. 

Síðani 2012 hevur verið ógreitt, um avlop av óbrúktari játtan hjá Granskingargrunninum skal falla aftur til landskassan. 

Hetta eru viðurskifti, sum als ikki kunnu góðtakast, siga løgtingsgrannskoðarnir og nú eisini Fíggjarnevndin.