FM á langgeil góðkent sum úttøkustevna til HM

Føroyameistarakappingin í svimjing á langgeil í Vági er nú góðkend av altjóða svimjisamgonguni, FINA, sum úttøkustevna til heimsmeistarakappingina.

Svimjing.com skrivar, at FINA hevur váttað fyri Svimjisambandinum, at føroyskir svimjarar kunnu royna eftir HM-kravtíðum, tá FM á langgeil verður í Vági í apríl.

Hetta er stórt stig fyri føroyska svimjing í altjóða høpi. Har afturat hevur Svimjisambandið nú eisini altjóða góðkendar dómarar og startarar, sum kunnu taka sær av eftirlitinum.

FM í Vági verður frá 26. apríl til og við 28. apríl. Heimsmeistarakappingin á langgeil, sum hesaferð verður í Suðurkorea, byrjar 12. juli í ár.