Færri vendu sær til Rættarhjálpina í fjør

Rættarhjálpin í Føroyum fekk 667 fyrispurningar í fjør. Tað vóru færri enn í 2017, tá fyrispurningarnir vóru 725.

17 mál vórðu byrjað í fjør og átta teirra vórðu eisini endað í fjør. Hetta eru eisini færri enn í 2017.

Fleiri kvinnur enn menn venda sær til Rættarhjálpina, 390 kvinnur og 274 menn í fjør. Í 86 førum vórðu tey, sum venda sær til Rættarhjálpina, víst til sakførara.

Flestir spurningar um arv

Fyrst og fremst løntakarar venda sær til Rættarhjálpina. Teir vóru góð 68 prosent í fjør. Og aldursbólkurin 30 til 65 ár er best umboðaður, hann er sløk 75 prosent.

Fólk spyrja Rættarhjálpina fyrst og fremst um arv og skifti. Tey vóru nógv størsti einstaki parturin í fjør, sløk 15 prosent.

Rættarhjálpin er fyri stóran part fíggjað úr Danmark. Løgmálaráðið letur henni slakar 390.000 kr. um árið og landsstýrið 50.000 kr.

Rættarhjálpin hevði 6.250 krónur í vinningi í fjør. Rættarhjálpin byrjaði í 1996.