Ársins fimleikarar heiðraðir

Fleiri enn 200 íðkarar, dómarar, samskiparar og onnur komu um vikuskiftið til fimleikagalla, har fimleikurin varð heiðraður.

Heiður var latin í átta ymsum bólkum.

Kaspara Danielsen ársins íðkari í amboðsfimleiki

Kaspara Danielsen vann heiðurin sum ársins fimleikari hjá kvinnum í amboðsfimleiki.

Í grundgevingini varð sagt, at hon hevur tikið seg nógv fram í ár, hon venur altíð miðvíst, og hon er positiv og glað.

Har afturat fremur hon gott samanhald og gott lag í fimleikahøllini.

kaspara_danielsen.jpg

Aron D. Jacobsen vann hjá monnunum

Aron D. Jacobsen er ársins amboðsfimleikari hjá monnunum í 2019.

Í grundgevingini varð sagt, at Aron, sum eisini bleiv føroyameistari í ár, hevur seinasta árið vant miðvíst og hart, hann er áhaldandi og motiveraður til venjing.
Hann hevur tikið seg fram í øllum amboðunum. Serliga kann nevnast beinsveiggj, sum er eitt torført amboð.

Árins venjarar í amboðsfimleiki blivu Barbara Debes Eiriksfoss og Djóni Sakarisson, bæði úr Havnar Fimleikafelagi.
 

aron_ambodsidkari.jpg

Hulda eigur ársins seriu

Í estetiska fimleikinum vann Hulda úr Havnar Fimleikafelagi heiðurin fyri ársins seriu.

Í grundgevingini verður millum annað sagt, at serian skapar eitt spennandi huglag og gevur eina veruleikakenda mynd av villari náttúru.

Har afturat er serian er á einum høgum torleikastigi, ið hevur verið við at menna íðkararnar í ár.

hulda.jpg

Rósan er ársins lið

Fimleikafelagið Støkk úr Runavík eigur ársins lið. Heiðurin fór til smágentuliðið, Rósan.

Í grundgevingini varð m.a. sagt, at liðið hevur víst stóran vilja og ágrýtni.

Venjararnir hjá Rósuni, Ásleyg Gregersen, Kristina Bjartalíð og Bjørk Nolsøe vunnu heiðurin sum ársins venjarar í estetiskum fimleiki.

arsinslid.jpg

Í estetiska fimleikinum bleiv eisini ársins drakt vald. Hendan heiðurin vann gentuliðið, Fenja, úr Havnar Fimleikafelagi.