Føroyar fleiri heiðursmerki í judo

Bárður Hentze Lenvig syrgdi fyri, at Føroyar fekk eina góða byrjan í judo, tá hann vann gull í -66 flokkinum fyrrapartin. 
Dánjal á Krákusteini hevði møguleikan at møta Bárði Hentze Lervig í finaluni, men tapti sína hálvfinalu. 

 - Tað hevði verið stuttligt at møtt Bárði, men tann finalan hevði verið drúgv. Eg gjørdi nøkur mistøk, og tí tapti eg hálvfinaluna, segði Dánjal á Krákusteini.

Tað sá lætt út, tá Jógvan Páll Kristiansen bardi seg í finaluna. Hann vann allar fimm innleiðandi dystirnar og hálvfinaluna ímóti landsmanninum, Gunnari Magnussen.
Men hann tapti finaluna, tá dómararnir mettu, at hann hevði gjørt trý sonevnd shido ella mistøk.

 - Eg kenni meg ikki snýttan, eg varð snýttur, segði Jógvan Páll Kristiansen, sum fanst hvassliga at dómarastøðinum.

 Gunnar Magnussen fekk bronsuheiðursmerki.

Fimta heiðursmerkið í dag vann Maiken Eivinnsdóttir Bringsberg, tá hon tryggjaði sær bronsu í -52 vektflokkinum.
Sætta og síðsta judo-heiðursmerkið í dag vann Silja Johannesen, tá hon gjørdist nummar trý av fimm í -63 flokkinum.