The Guardian: Føroyskur matur brýtur upp úr nýggjum

Tað eru stór orð, sum bretski journalisturin Micheal Booth hevur at bera føroyskari matmentan í greinini “Faroe Islands: The New Nordic Frontier”, sum The Guardian gav út leygardagin.

Booth greiðir í greinini frá vitjan síni í Føroyum, og upplivingum hansara við føroyskum mati og rávørum. Hann vitjaði m.a. bóndan á Stóru Dímum, var á hummaraveiðu og á Áarstovu og Koks.

- Gloym Keypmannahavn ella enntá Reykjavík. Eg havi hoyrt, at hesin hópurin av 18 grýtutum oyggjum mitt í Norðuratlanshavinum (...) er nýggi fronturin í nýnorðurlendsku matrørsluni. Eitt stað, har eitt lítil hópur av avgjørdum slóðbrótarum við einum framskygdum kokki á odda mennir framfúsa, nútímans matgerð burturúr tí mest berliga matmentanararvinum, skrivar Booth.

Hóast greinin yvirhøvur er sera jalig, og bretin greiðir frá stórum matupplivingum, kemur hann eisini við einari heldur skeptiskari lýsing av grindadrápinum í einari stuttari viðmerking. 

- Teir eru ikki viðkvæmir, føroyingarnir – hetta prógvar árliga summar grindadrápið eisini, sum at síggja til hevur eitt yvirbrá av einum familjufestivali (tó eyðsæð ikki fyri hvalirnar, sum verða slaktaðir, hóast teir eru so dálkaðir við kviksilvuri, at embætislæknarnir viðmæla, at teir ikki longur egna seg sum mannaføði).