Hvat, hvar og hví?

Hvat lesur tú?

Eg lesi politik og umsiting, eisini kallað stjørnmálafrøði, á 3 ári, so eg fari í holt við mína BA nú. Upprunaliga las eg International Relations (tað er altjóða politikkur) í London í eitt ár, men valdi at flyta heim aftur til Føroya og halda fram her.

Hvar lesur tú?

Sum sagt,  byrjaði eg at lesa í London, men eftir fyrsta árið var lokið, vildi eg flyta heim til Føroya og søkti um at sleppa at halda fram við útbúgvingini á søgu- og samfelagsdeildini á Fróðskaparsetrinum, har eg valdi meg inn á politik og umsiting linjuna. Tíbetur fekk eg alt skúlaárið í London góðskrivað.

Hví valdi tú júst hetta?
 

Góður spurningur. Eg valdi tað ikki beinleiðis, eg prøvaði meg fram, og endaði her – og her føli eg, at eg havi funnið mína hill. Mín áhugi er fjøllbroyttur, og eg kundi hugsað mær at lisið næstan alt.

So eg prøvaði meg fram; fyrst á einari grønari-miljø ingeniør útbúgving, síðani sum bioanalytikara, byrjaði at supplera kemi og fysik á A-støði.

Hóast alt hetta var áhugavert, var tað ikki júst tað. So valdi eg brádiliga at fara til London og byrja upp á eina politik útbúgving, og har fall 5 oyra – hetta var akkurát tað.

Mær dámdi væl at lesa í London, men valdi at flyta heim, tí eg og sjeikurin blivu við barn, og eg vildi ikki búgva í London við einum barni.

Eg søkti tí um góðskriving á Setrinum– og hetta er tann besta avgerðin, eg havi tikið. Eg elski at ganga á Setrinum – góðir lærarir, áhugaverd fak og deiligir floksfelagar.