Hetta eru útbúgvingarnar, sum flest hava søkt

Í gjár kl. 00.00 gekk freistin út til at søkja hægri lestur í Danmark. 92.477 hava søkt, og hetta er hægsta talið nakrantíð. Hetta er eitt prosent hægri enn í 2014, sum var árið við flest umsøkjarum til hægri lestur, skrivar DR. 

- Sum heild er tað gott og gleðiligt, at so nógv ung eru vorðin tilvitað um, at útbúgving er lykilin til bæði frælsi yvir sínum egna lívi og til at gerast ein dámligur partur fyri arbeiðsmarknaðin, sigur útbúgvingarráðharrin Esben Lunde Larsen (V).

10 tær mest umtóktu útbúgvingarnar

Á listanum niðanfyri ber til at síggja tær útbúgvingarnar, sum hava fingið flest umsóknir í ár. Pedagogútbúgvingin er á odda, og høga talið vísir ikki bara, hvussu umtókt útbúgvingin er, men eisini, at mann kann lesa námsfrøði fleiri staðni í landinum, og tískil er útbúgvingin so væl umtókt.

1. Námsfrøði: 7.134 umsøkjarar (- 658)

2. Sjúkrarøktarfrøðing: 5.662 umsøkjarar (178)
3. Læknavísindi: 3.397 umsøkjarar (222)
4. Diplomverkfrøðing: 3289 umsøkjarar (405)
5. Sosialráðgevi: 3186 umsøkjarar (254)
6. Civiliverkfrøðig: 2821 umsøkjarar (95)
7. Marknaðarførsluøkonom: 2.753 umsøkjarar (263)
8. Fólkaskúlalærari: 2.745 umsøkjarar (233)
9. Alisviðgeri: 2.734 umsøkjarar (- 50)
10. Løgfrøði: 2.469 umsøkjarar (55)

Talið í klombur vísir økingina ella fallið av umsøkjarum samanborðið við talið í fjør.

Umsøkjarar fáa svar 30. juli, um tey eru sloppin inn ella ikki.

Setrið væl umtókt

Fróðskaparsetur Føroya hevur eisini fingið nógvar umsóknir í ár. Talið av umsøkjarum í ár er 379 og er hægri enn í fjør, tá ið 336 søktu inn.

Niðanfyri ber til at síggja, hvør útbúgving á setrinum er mest umtókt.

1. Fólkaskúlalærari: 86 umsøkjarar
2. Sjúkrarøktarfrøðing: 81 umsøkjarar
3. Námsfrøði: 67 umsøkjarar
4. Sosialvísindi og samfelagsplanlegging (samfelagsvísindi): 27 umsøkjarar
5. Orkuverkfrøði: 25 umsøkjarar
6. Føroyskt (bachelor): 23 umsøkjarar
7. Løgfrøði (master): 23 umsøkjarar
8. Søga (smátjóðir og altjóðagerð): 19 umsøkjarar
9. Masterlæra í søgu- og samfelagsvísindi: 17 umsøkjarar
10. Politikkur og umsiting (samfelagsvísindi): 9 umsøkjarar
11. Føroyskt (master): 2 umsøkjarar

Kelda: www.setur.fo

Umsøkjarar fáa svar um upptøku í seinasta lagi 13. juli 2015.