Vígdis Fjallstein: Sannleikans Loyndir

'Sannleikans Royndir' hevur Vígdis skrivað saman við Magnusi Fjallsá, og er tað tikið upp í Klaksvík hja Raclip Carpet Session.

- Teksturin snýr seg um, hvussu kenslurnar broytast ímóti náttini, sigur Vígdis. Tá tað blívur myrkt, geva vit okkum sjálvum loyvi til at slappa meiri av, vit tora betur, og ofta er tað tá, kenslurnar taka yvir. Eisini snýr tað seg um forelskilsi. Tað er sum at fara á flog ella at flóta langt út á havið, alt tykist at bera til. Um tað er rætt ella skeivt, er týdningarleyst.

- Heitið á lagnum sipar til, at myrkrið kann fjala loyndarmálið aftan fyri sannleikan, men tá mann kemur ímóti ljósum morgni, snýkir loyndarmálið seg ofta framm. Eg trúgvi, at tað altíð er eitt loyndarmál aftan fyri tað, sum vit "halda" er sannleikin. Vit kunnu ongantíð vera heilt vís í, at tað vit lesa, hoyra og síggja er sannleikin. Tað er bert nakað, ið vit kunnu velja at trúgva. 

'Sannleikans Royndir' er tað fyrsta av trimum løgum hjá Vígdis, sum koma út í nærmastu framtíð.