TB'ararnir heiðraðir

Í samband við fyrimyndarligu luttøkuna hjá “TB’arunum” Adrian Park og Gilla Augustinussen í spurnarkappingini Orrustuni hjá Kringvarpinum, bjóðaði ungdómsdeildin hjá TB teimum báðum, saman við øllum U14 dreingjunum til pizza, í ítróttarhúsinum eftir venjingina í gjár.
 

Sambært TB heimasíðuni var lagið gott á dreingjunum, og sum rættir TB’arir, sungu teir TB sangin og føðingardagssangin fyri TB, ið hevði føðingardag 13. mai. Tá bleiv felagið 124 ár.
 

Formaðurin í Tvøroyrar Bóltfelag, Niels Pauli Eysturberg rósti teimum báðum, Adrian og Gilla fyri teirra stóra áhuga og vitan um felagið. Síðan fingu teir handað eina gávu frá felagnum.