- Tíðindi, mentan og ítróttur
Er nú eisini skuldsettur fyri aðrar neyðtøkuroyndir
<div>19 ára gamli maðurin, sum fyri einum mánaði síðani varð varðhaldsfongslaður fyri eina neyðtøkuroynd í Viðarlundini í Havn, er nú skuldsettur fyri fýra aðrar neyðtøkuroyndir, allar í Havn.</div><div><br></div><div>Á rættarfundi í morgun játtaði maðurin seg sekan í trimum skuldsetingum og partvíst sekan í einari.</div><div><br></div><div>Neyðtøkuroyndirnar, maðurin nú eisini er skuldsettur fyri, vóru í juni í 2010, í juli og oktober í 2011 og hálvan januar í ár.</div><div><br></div><div>Kvinnurnar, maðurin er skuldsettur fyri at gera seg inn á, vóru, tá tær blivu álopnar, ávikavist 26, 22, 21 og 20 ára gamlar.</div><div><br></div><div>Tá maðurin fyri einum mánaði síðani var í grundlógaravhoyring fyri tilburðin í Viðarlundini fyrst í februar í ár, noktaði hann seg sekan.</div><div><br></div><div>Eftir at ákærin hevði lisið tær fýra nýggju skuldsetingarnar í morgun, helt rættarfundurin fram fyri afturlatnum hurðum.</div><div><br></div><div>Sambært skuldsetingunum gjørdu allar kvinnurnar harða mótstøðu og róptu um hjálp. Tað gjørdi, at skuldsetti maðurin fekk ikki framt tað, sum hann ætlaði.</div>
