- Tíðindi, mentan og ítróttur
Kommunan noktar at gjalda meiri fyri skúlan
<div>Tað er rættiliga sannlíkt, at ósemjan um rokningarnar frá byggifelagnum Búsetri í sambandi við Skúlan á Løgmannabreyt endar í gerðarættinum.</div><div><br></div><div>Advokaturin hjá kommununi hevur nú gjøgnumgingið krøvini hjá Búsetri, og niðurstøðan hjá honum er, at Búsetur hevur ikki rætt til at fáa meira pengar útgoldnar. Tað ger advokaturin greitt í skrivi til Búsetur, dagfest tann 4. juni, sum útvarpið hevur fingið innlit í.</div><div> </div><div>Búsetur og kommunan hava leingi togast um endauppgerðina í sambandi við skúlan við Løgmannabreyt. Búsetur hevði høvuðsarbeiðstøkuna, men tíðina eftir, at skúlin var liðugur, var stór ósemja millum partarnar um, hvussu skuldi avroknast. </div><div><br></div><div><b>Semja gjørd</b></div><div><br></div><div>Ein semja varð gjørd í fjør - helt Tórshavnar kommuna í øllum førum - men fyrst í hesum árinum kom Búsetur við einari rokning upp á 12,7 milliónir krónur. Búsetur sigur m.a. í kravinum, at projektgjøgnumgongdin var ónøktandi og førdi til eyka arbeiði, at meginparturin av lendinum lá lægri enn uppgivnu projektkodurnar og at tað tí var neyðugt at leggja tilfar omaná, og at ósamsvar var millum betongtekningar og arkitektaprojektið.</div><div><br></div><div>Men eftir at hava gjøgnumgingið skjalatilfarið hjá Búsetri, vísir advokaturin hjá kommununi øllum krøvunum hjá byggifyritøkuni blankt aftur. </div><div><br></div><div>Advokaturin sigur, at talan í stóran mun er um rokningar frá undirveitarum hjá Búsetri til Búsetur. Hesar rokningarnar eru óviðkomandi fyri kommununa, tí hon hevur bara gjørt sáttmála við Búsetur.</div><div><br></div><div>Eisini sigur advokaturin, at rokningarnar í stóran mun vísa til viðurskifti, ið eru skrivliga avgreidd millum partarnar, og at tað tí talan er um dupulta avrokning. </div><div><br></div><div><b>Hava ikki meiri at tosa um</b></div><div><br></div><div>Tórshavnar kommuna metir ikki, at skjølini hjá Búsetri prógva, at felagið hevur rætt til at fáa útgoldið meira pengar í hesum máli. Og advokaturin sigur bart út, at tað er ikki grundarlag at tosa meira um málið.</div><div><br></div><div>Búsetur hevur biðið um at fáa málið avgjørt við ein gerðarrætt, men hevur annars sagt seg sinnað fyrst at fáa málið avgreitt við samráðingum. Men nú advokaturin hjá kommununi boðar frá, at grundarlag ikki er at tosa meira um málið, fer málið mest sannlíkt í gerðarrættin.</div><div><br></div><div><div>Ósemjur innan byggivinnuna, sum ikki verða loystar við samráðingum, verða vanliga avgjørdar í einum gerðarætti. Skipanin er tann, at stríðandi partarnir velja ein byggikønan í part at umboða seg, og so er ein løgfrøðiligur dómari, sum vanliga er sorinskrivarin.</div><div><br></div></div><div><br></div><div><br></div>
