Ákærin: Vitni hava sæð onkran annan

Øll tey 11 fólkini, sum siga seg hava sæð Dánjal Petur Hansen fríggjadagin 4.november ella leygardagin 6.november í fjør, fara antin skeiv av døgunum, ella hava tey sæð onkran annan.

 

- Eg sigi ikki, at vitnini søgdu ósatt, tá tey vóru her, segði Linda Hesselberg, ákæri, í nevningatinginum í gjár.

 

Men, legði hon afturat, tey fara antin skeiv av døgunum, ella hava tey sæð onkran annan enn Pidda. Ákærin minti nevningarnar á, at einki vitni kundi til dømis siga, á hvørjum fóti, Piddi haltaði. Í tveimum førum bar til hjá politinum at eftirkanna vitnisfrágreiðingar, segði ákærin.

 

 

Eitt vitni segði seg hava sæð og tosað við Pidda í einum handli á Glyvrum leygardagin 5.november. Men kanningar hjá politinum siga, at eingin keypti tað, sum vitni segði, at Piddi keypti, í handlinum tann dagin.

 

Eitt annað vitni sigur seg hava sæð Pidda í Saltangará fríggjadagin. Men sambært politinum var fartelefonin hjá Pidda á Nesi stívliga eitt korter frammanundan, so Piddi skal hava gingið góðar fimm kilometrar upp á 16 minuttir, segði ákærin.

 

Og tað er neyvan sannlíkt, segði ákærin. 

 

 

Linda Hesselberg bað eisini nevningarnar hugsa um, hví Piddi ongantíð var heima við hús á Gerðisvegi hesar báðar dagarnar, og hvar svav hann og hvar át hann?

 

Tey 11 vitnini hjá verjanum hava ikki ávirkað ástøðið hjá ákæruvaldinum, sum er, at ákærdi maðurin leyp á Pidda í sovikamarinum á Gerðisvegi 34 fríggjanáttina ella tíðliga fríggjamorgunin 4.november. Antin doyði hann tá alt fyri eitt ella seinni um morgunin.