Eik skal gjalda Poul Michelsen 320.000 kr.

Føroya rættur hevur dømt í sakarmálinum, sum Poul Michelsen og Sólborg Dulavík reistu móti Eik Banka, tí tey mistu pening í sambandi við virðisbrøv

Poul Michelsen hevði eitt sakarkrav afturat, sum hann fekk viðhald í og sum ger, at Eik Banki skal gjalda honum slakar 320.000 kr. sambært dóminum hjá Føroya rætti.

Høgni Djurhuus

Johnsigurd Johannesen

01.07.2013 - 15:15

Poul Michelsen fekk partvíst viðhald, men Sólborg Dulavík, sum hevði eitt sakarkrav minni enn Poul Michelsen, fekk ikki viðhald í sínum krøvum.

Eik Banki varð frídømdur í Føroya rætti í bæði fyrsta og øðrum sakarkravinum hjá Poul Michelsen og Sólborg Dulavík. Hesi bæði sakarkrøvini vóru tey somu hjá báðum.

Eitt krav afturat

Men so hevði Poul Michelsen eitt sakarkrav afturat, sum hann fekk viðhald í og sum ger, at Eik Banki skal gjalda honum slakar 320.000 kr. sambært dóminum hjá Føroya rætti. Talan er um tey sonevndu tryggu evropeisku virðisbrøvini, sum Kaupting Banki seldi í Føroyum í 2006.

Nógv í Føroyum keyptu virðisbrøvini, tí tey skuldu vera ein trygg íløga. Men tann tryggleikin hvarv sum døgg fyri sól, tá amerikanska bankin Lehmann Brothers fór á heysin í 2008. Eik yvirtók Kaupting í Føroyum í 2007, og tí stevndu Poul Michelsen og Sólborg Dulavík Eik Banka eftir pengunum, sum tey mistu.